فضفضة ملخبطة

السلام عليكم ورحمة الله وبركاته



بداية أحب أشكر اللي سأل عني..وهو صاحب مدونة (( آلام وآمال))..جزاك الله كل خير

وأشكر كل الناس اللي شرفتني بالزيارة للمدونة..هي بسيطة جدا وانا مش كاتبه كتير..بس اعذروني لسه في البداية..بس أنتو أدخلتم الفرحة لقلبي بتلك الزيارة..أتمنى ألا تكون الأخيرة

انا تعبانة الفترة دي شوية..حتى بكتب وانا مش حاطه في دماغي حاجة معينة هتكلم عنها



حاجات كتير خنقاني وهتكلم عن حاجات متفرقة



اولهم : ماما..وحشتني اوي اوي ..وبابا واخواتي كمان..وحشتني لمتنا سوا على الاكل...وحشني الكلام مع ماما..نفسي اشوفها ..احكيلها..اقولها اللي بيحصلي في بعدها..اقولها ان البيت من غيرهم ملهوش روح نهائي..اتخنقت يا امي من الاربع الحيطان اللي انا قاعدة وسطهم دول..ازعل افرح اي حاجة بينهم برضه

نفسي حد يهتم بيا..حد يساعدني في البيت وفي الحاجة اللي بعوزها..نفسي ارجع الاقي اكل معمول من ايديكي الحلوين دول

نفسي اما اتعب حد يسال عني..نفسي الاقيكي بتديني الدوا..عشان انتي عارفة اني بنسى مواعيد الادوية

نفسي اقعد احكي معاكي وانتي تحكيلي ونقعد نضحك جامد اوي..اشتقت في ان احنا نعاند بعض..انا كنت انا وماما نهزر مع بعض ونضحك

نفسي اما اتاخر الاقي رقمك على موبايلي...ارد الاقيكي ملهوفة عليا وتساليني اتاخرت ليه؟؟وقدامي قد ايه

نفسي اما احتاج اطلبها من غير كسوف..دلوقتي انا حتى لو نفسي في اي حاجة..مش بطلبها من حد..بستنى لحد ما ابقى مع اهلي ويجيبولي

اللي انا عاوزاه...واللي عرفته ان مفيش حد احن عليك من اهلك..والله يا جماعة مهما كان قريب منك الشخص ده

مهما كانوا قرايبك حواليك..وبتحبهم وبيحبوك..برضو هتحس بالوحدة بينهم

انا لما بعوز حاجة بعملها لنفسي لان محدش فاضيلي..ولو معرفتش استنى الفرج



دي حاجة



ثانيهم : الكلية معرفش السنة دي خنيقة اوي كده ليه..كل حاجة ملخبطة..والدكاترة بتدي كميات كبيرة اوي ..والمعيدين نايمين في العسل..اضطريت اخد دروس..طبعا ضغط وبهدلة لاوقات متاخرة



مواد كتير ضايعة..مش عارفة في ايه..يارب خليك معانا بجد..هونها علينا وسهلها



دعواتكو



ثالثهم : البهدلة...بجد يا جماعة انا بقيت اكره اليوم اللي انزل فيه الكلية..الرجالة بقت حقيرة اوييييييييييي..ايه اللي بيحصل في الدنيا.؟؟

طبعا المواصلات مش بروح الموقف الاقيها..لا ده انا اروح واقف مع الامة اللي في بتبقى واقفة..طبعا اي عربية بتيجي ’’الرجالة المحترمين ’’ بيهجموا عليها..دون اعطاء ادنى فرصة للبنات انهم يركبوا...بالعكس ده ممكن يلاقيكي واقفة يوم زاقك عشان حضرته يركب

طبعا انا مستحيل اتزاحم مع الرجالة دي..فبفضل واقفة اتفرج وادعي ربنا..لحد ما تتسهل



يوم ما اركب بقى ..اتشرف بركوب ’راجل ’ جنبي..ياريت بقى يقعد محترم على الصبح..لا ازاي ده حتى يبقى غلط...يقوم طبعا لازق فيا مثلا او يعمل حركات قليلة الادب..طبعا ببقى هتجنن..وببقى هعيط بجد..بتخنق اوي..بقيت اكره اليوم اللي اخرج فيه



غيير كده مضايقة ان لبسي كله باظ واتبهدل بسبب اللي بشوف ده



رابعهم : الناس والاصحاب ..عمالة اتصدم في ناس..بعامل الناس كويس..واظن فيهم كويس..وفي الاخر يطلعوا مية من تحت تبن



واللي جرحني اوي من فترة قريبة..كان ليا صاحبة لا تتصورو كنا بنحب بعض قد ايه..هي اكبر مني بسنة في نفس القسم..فكانت بتفيدني كتير



المهم نتيجة لظروف الاجازة ووفاة جدي..وولاد خالي اللي كانو مسافرين وبقالي 4 سنين مشفتهمش..نزلوا لمدة 3 اسابيع فقط..فطبعا تخيلوا بيت عيلة وناس داخل وناس خارجة..غير كده اهلي موجودين..وانا مش بشوفهم الا كل سنة..طبعا مكنتش بكلم حد خالص..فهي الله يكرمها يعني افتكرت اني استغنيت عنها..وان طول ما اهلي مش موجودين كانت حبيبتي..واما جم انا استغنيت عنها..



افهم فيها.. وهي دماغها الف جزمة ان انا غلطانة واني واني واني



وبعدت عني بحجة اني جرحتها..واني مش بحبها..وانها مش مستعدة كل ما تعرف حد ميقدرش معاملتها ويسيبها



جرحتني اوي..معرفش هو انا وحشة اوي كده بخلي الناس تزعل مني كتير وانا مش حاسة..يااااارب أأجرني في مصيبتي وارزقني خيراً منها



بجد حاسة اني تايهة ،،مخنوقة..وعليا ضغط كبير..وربنا يسترها بجد



طبعا انا اسفة اني خنقتكوا انتو كمان..بس ياريت تدعولي



ويااااارب لا تحسب شكوايا هذه اعتراض يارب..انما اشكو بثي وحزني اليك يا رحيم..



اللهم ارحمني رحمة تغنيني بها عمن هم سواك يا ارحم الراحمين



اللهم ارني الحق حقاً وارزقني اتباعه..وارني الباطل باطلاً وارزقني اجتنابه



اللهم اعفو عني واغفر لي ذنبي واهدني وثبتني..واحفظني من اصحاب السوء..وارزقني الصحبة الصالحة



ولا تحرمني ممن احبهم يارب العالمين



اللهم اني اشكو اليك ضعف قوتي وقلة حيلتي وهواني على الناس



انت رب المستضعفين..اشملني برحمتك



آمين



والسلام خير ختام